Apil ang Zamboanga del Norte sa 129 ka mga lugar dinhi sa Pilipinas nga makapahimulos sa dugang binipisyaryo sa programang Kapit-Bisig Laban sa Kahirapan-Comprehensive and Integrated Delivery of Social Services (Kalahi-CIDSS) karong sunod tuig 2012, diin ang gibasihan mao ang resulta sa survey sa National Statistics Office (NSO) nga mga pobring probinsya ug lugar tibook nasud.
Ang pagpalapad sa naasyong programa pinunduhan kini ug US$59.12 million diin loan sa Pilipinas gikan sa World Bank , ug lain pang US$120-million gikan sa Millennium Challenge Corporation pinaagi sa Australian Agency for International Development ug Office of the Presidential Adviser on the Peace Process.
Labing tutukan sa programang Kalahi-CIDSS mao ang paghimu ug mga water systems sa mga barangay, mga kadalanan, pagpatukod ug school buildings, mga barangay health stations ug Day care centers, ug uban pang nag-unang problema ilabina sa mga lagyung barangay.
Samtang gihagit ni DSWD Asst. Regional Director Arevalo ang kagamhanang probinsyal ubos ni Gov. Rolando Yebes nga motabang ug mosuporta kini sa pagpatuman sa naasyong programa alang sa kalamboan sa mga Zanortehanon.
ARCHER M. CAPADESO