Alayon sa tinguha nga mapatuman ang usa sa mga priority projects sa kagamhanang lokal sa dakbayan sa Dipolog nga ma-establisar ang Corazon C. Aquino Hospital, niini mihangyo karon ang mga opisyal sa Dipolog ngadto sa buhatan sa (Philippine Charity Sweepstakes Office) kon PCSO ug usa ka unit sa ambulansya aron makahatag o makahatod kini sa mga saktong serbisyo ngadto sa mga Dipolognon diha sa natad sa panglawas.
Gumikan sa maong hangyo, usa ka resolusyon ang gipadas-og ni konsehal Atty. Jasmin N. Pinsoy atol sa regular nga sesyon niadtong nakalabayng semana isip usa sa mga rekisitos alang sa maong katuyoan. Nasayran nga gi-adaptar ang 60 - 40 Cost Sharing Scheme, diin ang 60 % magagikan sa PCSO ug 40 % gikan usab sa LGU. Dugang nasayran nga ang pamunoan sa syudad nga mao’y miproponer alang sa pag-establisar sa maong tambalanan, ang nagdirihir aron makab-ot ang ‘Four As’ alang sa usa ka epektibong sistema sa usa ka ospital, sama sa Accessibility, Availability, Affordability, and Acceptability. Nasayran nga ang katuyoan sa maong proyekto mao ang paglugway sa mga serbisyo sa duha ka matang sa pasyente, ang ‘in ug out patients’. Pero ang maong katuyoan mamahimong posible lamang kung duna’y maangkon nga mga Vital Medical Equipments. Mardy D. Libres Malampuson ang nahimong deliberasyon sa pipila ka mga school principals, City Schools Division Education Supervisors, representante sa mga pribadong tulunghaan, ug mga ahensiya sa lokal nga buhatan sa DTI, BFAR, ug DOLE, lakip na sa presensiya ni Mayor Evelyn T. Uy, City Schools Superintendent Victorina G. Perez, Konsehal Dante G. Bagarinao, GPTA President Peter Cuenca, CPDO Engr. Albert T. Alimpulos, ug City Treasurer Sancen D. Caroro, atol sa gipahigayong consultation meeting may kalabot na sa implementasyon sa Senior High School Program sa DepEd sa tuig 2016, nga gipangandaman na karon sa kagamhanang lokal ug City Schools Division sa Dipolog.
Atol sa maong consultation meeting nga gipahigayon sa conference room ni Mayor Uy, gituki ang mga isyu nga mao unyay mahinagbu-an atol sa implementasyon sa SHS dinhi sa dakbayan, ug migula nga dili lang mga classrooms ang gikinahanglan apan ilabina gyud ang gikinahanglang mga magtutudlo alang sa mga specialized courses nga motubag sa panginahanglanunun sa SHS tracks gikan sa academic, tech-voc livelihood, sports, ug arts & designs. Nahisgutan usab ang mga punto sama sa: 1) “displacement” unya sa ubang magtutudlo nga tubagun sa Department of Labor & Employment; 2) pasi-unang tubagun sa BFAR ang kakulangon sa trained teachers may kalabot na sa aquaculture, fish management ug fish processing; 3) gamiton una sa SHS program ang available facility nga napahimutang sa ubang tulunghaan; 4) ipa-ilawom sa ha-om nga bansay-bansay ang hingtungdang magtutudlo; 5) ug ang temporaryong pagdawat sa mga magtutudlo nga nawad-an ug “teaching load” gumikan sa implementasyon sa SHS nga motudlo sa mga special classes. Sumala pa ni Mayor Uy, kini nga pagpangandam sa kagamhanang lokal ug city schools division sa DepEd nagsumikad sa pagdawat sa Dipolog City sa League of Cities of the Philippines (LCP) nga mamahimong usa sa napulo ka resipiyenteng siyudad sa tibook nasud nga matabangan sa implementasyon sa programa sa SHS-LCP. Sa kasamtangan, gihan-ay na sa City Schools Division sa Dipolog ang preparasyon sa implementasyon sa SHS-LCP sa Dipolog, aron matubag ang mga isyu nga nahisgutan sa nauna. Human sa planning session nga ipahigayon sa Zamboanga City sa Pebrero 16-17, 2015, magtigum pag-usab ang grupo aron matuki o mahatagan ug rekomendasyon ang angay ipatuman sa SHS dinhi sa Dipolog sa tuig 2016. Mardy D. Libres Naglaum si Police Chief Inspector Roland H. Barraquio, presidente sa Philippine National Police Alumni Association, Inc. Zamboanga del Norte Chapter ug kanhi PNP Special Action Force (SAF) member nga mahatagan ug histisya ang 44 ka mga SAF commandos nga namatay sa engkwentro sa Bangsamoro Islamic Freedom Fighters (BIFF) ug Moro Islamic Liberation Front (MILF) sa Mamasapano, Maguindanao niadtong Enero 25.
Matud pa sa opisyal, dinhi sa Zamboanga del Norte nagtoo sila sa gitawag ug due process ug sila naglaum nga ilawom sa pamunuan ni Police Deputy Director General Leonardo A. Espina, siya makatabang sa paghatag ug hustisya sa kamatayon sa ilang mga kauban diin apil sa 44 ka mga SAF member nga namatay si PO3 Victoriano N. Acain lumad nga taga-Zamboanga del Norte. Alang kaniya, kadtong mga PNP-SAF members kinsa miapil sa “operation wolverine” aron pag-aresto sa duha mga international terrorist nga sila si Abdul Basit Usman ug Zulkifli bin Hir alyas Marwan maoy pinakamaayo alang sa maong importanteng misyon. Si PCI Barraquio maoy nanguna usab sa sympathy walk alang sa 44 fallen heroes apil ang mga miembro sa Zamboanga del Norte Police Provincial Office, Dipolog PNP, PNP-SWAT, SOCO, BFP, BJMP apil usab ang ubang miembro sa 101st Infantry Brigade, Phil Army. Mardy D. Libres 19TH AWARENESS WEEK ON CHILD AND COMMERCIAL SEXUAL ABUSE / EXPLOITATION GISAULOG. (2-10-2015)2/10/2015 Kasamtangan karong gisaulog sa syudad sa dipolog ang “19th National Awareness Week for the Prevention of Child Sexual Abuse and Commercial Sexual Exploitation” nga gisugdan niadtong domingo pebrero 8 ug matapos usab sa pebrero 14 ning tuiga.
Mao kini ang nakuhang impormasyon gikan sa Memorandum Circular no. 2015-03 nga giluwatan sa nasudnong buhatan sa DILG nga gipetsahan ug Enero 27, 2015 ug pinirmahan ni kalihim Mar A.Roxas. Sumala sa unod ning maong circular nga sumala sa proklamasyon no. 731, serye sa 1996, and ikaduhang semana sa bulan sa Pebrero sa matag tuig ang gideklarar isip “National Awareness Week for the Prevention of Child Sexual Abuse and Commercial Sexual Exploitation” o nailang Child Sexual Abuse Awareness Week (CSAAW), diin paga-saulogon sa matag tuig ilawom sa pagpanguna sa Council for the Protection of Children. Sumala pa nga alang ning kasamtangang tuig sa 2015, kining usa ka semana nga kasaulogan ang nagdala sa tema nga: “Labanan ang Pang-aabusong Sekswal sa mga Bata: NOW NA! kining tinuig nga pag-obserbar pinaaagi sa CSAAW ang magatudlo kon unsaon sa pagmugna sa palibot nga luwas, mapanalipdon ug amomahon alang sa mga kabataan. Subay ning maong kasaulogan, gi-awhagan ang tanang mga hepe ehekutibo sa mga lokal nga kagamhanan sa pagsuporta niini dinha sa ilang matag dapit, uban na sa pagpanguna ug pipila ka mga kalihokan sama sa:1.) Pagkutay ug mga streamers; 2) Pagsangyaw ning maong kalihokan atol sa flag raising ceremony; 3) pagmugna ug mga lectures ug symposiums kalabot sa maong kasaulogan , 4) pagmugna ug mga indigay sa pagpinta/ quizbee nga magpakita sa tema ning maong kasaulogan ug 5) pagmuna ug mga fun run ug uban pa. Mardy D. Libres USA ka 50 anyos nga lalaki anaa sa kritikal nga kahimtang gumikan gidunggab sa iyang igsoong tanod nga iyang nasumbagan atol sa disko niadtong sabado sa alas 10:00 sa gabii sa Barangay San Jose, sakop sa lungsod sa La Libertad, ning lalawigan sa Zamboanga del Norte.
Si Zusimo Sanag Vidad, 50 anyos, balo, nakaangkon og samad dinunggaban sa tiyan human giluba sa iyang igsoon nga si Cornelio Sanag Vidad, 54 anyos, minyo, usa ka tanod, diin ang duha polos lumulupyo sa nasampit nga barangay. Sa report sa La Libertad Police Station nasayran, nga si Cornelio nag duty niadtong higayuna sa may barangay hall gumikan dunay gipahigayon nga disko sa maong barangay, apan atol sa maong disco nasiplatan niya ang igsoon si Zusimo nga gituohan ubos sa impluwensya sa ilimnon makahubog nga misulay sa pagsulod niagi sa koral sa paglikay bayad sa pultahan. Daling gidu-olan niya ang igsoon ug gibalong, nga gikasuko sa biktima nga misampot sa pagpanumbag ug naigo ang dagway sa suspetsado ug nahagba. Tungod sa iyang kalagot sa igsoong, nikuha siyag kutsilyo ug gidungab sa usa ka higayon ang biktima. Ang biktima nakaangkon samad sa tiyan, daling gidala sa Zamboanga del norte Medical Center hinongdan nga anaa sa talandugon nga kahimtang. Samtang ang suspetsado boluntaryong mitahan sa iyang kaugalingon ngadto sa opisyales sa maong barangay ug gilayon gitugyan sa kapitan sa La Libertad Municipal Police Station alang sa dugang imbestigasyon. Lakip gitugyan ang kutsilyo gigamit nga dunay gitas-on(10) napulo ka pulgada. Sa karon ang suspetsado gibalhog sa selda ug naghulat nalang sa pormal nga reklamo batok kaniya. Rogie Monera NADAKPAN sa kapolisan sa piñan ang ika-unom sa listahan sa most wanted person pinaagi sa man-hunt operation niadtong beyernes mga alas 6:25 sa buntag Barangay Poblacion North, Lungsod Sa Piñan Ning Lalawigan Sa Zamboanga Del Norte.
Ang suspetsado giila sa kapolisan nga mao si Arnel Lopre Cabilin, 32 anyos, ulitawo nga taga sa Barangay Taguilon, sakop sa dakbayan sa Dapitan. Sa report sa Piñan Police Station nga anaa ang suspetsado sa ika unom sa ilang listahan sa mga most wanted person sa municipal level nga adunay kaso nga Attempted Rape. Gi-arresto kini sa kapolisan pinaagi sa gahum sa usa ka warrant of arrest nga giisyu ni Judge Chandler Ruiz, Presiding judge, Branch 10, Regional Trial Court 9th Judicial Region ning siyudad ug dunay criminal case number 16246 sa maong kaso diin adunay piyansa nga P120 mil pesos alang sa iyang temporaryo nga kagawasan. Karong panahona, nagtingkagol na sa selda sa Piñan aron sa pag-atubang sa kasong ipahamtang batok sa maong suspetsado. Rogie Monera Mokabat sa P22 milyones ka pesos nga mga proyekto ubos sa Priority Poverty Reduction Projects ang andam na nga ipatuman karong tuiga sa kagamhanang lokal sa Dipolog.
Sa panagtigom sa mga sakop sa City Local Poverty Reduction Action Team (CPRAT) nga gipahigayon sa buhatan sa mayor niadtong nakalabayng adlaw, gipagawas ang listahan sa mga priority projects sa 2015 Grassroots Participatory Budgeting (GPB)-National Expenditure Program (NEP) nga nakuha gikan sa Department of Budget and Management pinaagi sa City Planning and Development Office. Kini naglangkub sa mga mosunod: Nagkadaiyang proyekto sa Department of Agriculture, pagmugna ug nursery, marine protected area, balut production, farm implement and post harvest facilities, production of organic fertilizer, rehabilitation of school classroom, nagkadaiyang DILG projects, climate change adaptation, CSO capability building ug livelihood project, mobilization of community health teams, rehabilitation of barangay health center, rehabilitation of 50 day care center, livelihood skills training, rural micro enterprise development program ug livelihood skills training. Tumong sa kagamhanan nga mahatagan ug dalan nga makalingkawas sa kalisud pinaagi sa pagpataas sa socio-economic nga kahimtang ang katawhan pinaagi sa paghatag sa maayo ug gikinahanglang nga mga proyekto. Ang nasangpit nga pondo ang naga- gikan sa lain-laing buhatang nasyonal sama sa Department of Agriculture (DA), Department of Education(DepEd), Department of the Interior and Local Government (DILG), ug Department of Health (DOH). Lakip usab nga mihatag ug pondo ang Department of Social Welfare and Development (DSWD), Department of Trade and Industry (DTI) ug Technical Education Skills and Development Authority (TESDA) Department of Labor ug (DOLE). Duna usay gipahat nga kantidad ang kagamhanag lokal sa Dipolog isip LGU counter-part. Mardy D. Libres Lain na usab nga mga donasyon ang gihatag sa Children’s International –Philippines Inc. pinaagi sa Rotary Club of Dipolog ang gidawat ni Dipolog City Mayor Evelyn T. Uy karon lamang bag-o, didto mismo sa buhatan sa iyang buhatan.
Mikabat sa 18 ka mga kahon sa mga medical/laboratory supplies ug 20 ka mga bola alang sa dulang football ang pormal nga gitunol ni Dr. Stephen Calunod, ang kasamtangang presidente sa Rotary Club of Dipolog ngadto kang Mayor Uy didto sa iyang buhatan. Misaksi sa kalihokan sila si Zamboanga del Norte Red Cross Administrator Joshua Bicoy ug Central Barangay Chairman Rosanna Diaz. Si Uy mipasalamat sa Rotary Club of Dipolog ug Children’s International sa ilang kanunay nga suporta ug pagpakigtambayayong sa kagamhanang lokal sa dakbayan alang sa paglambo sa Dipolog . Nasayran nga ang Children’s International –Phil, Inc. usa ka non-profit humanitarian organization nga naghatag ug pagtagad aron mapagaan ang epekto sa kalisud sa mga kabos nga mga batang Filipino. Mardy D. Libres |
NEWS - Balita
Mga Balita, para sa kasayoran sa tanan. Archives
February 2016
Categories |