Sa pinakaunang higayon, napili isip venue sa ika-13 nga National Convention sa Association of Tourism Officers of the Philippines (ATOP) ang probinsya sa Zamboanga del Norte nga gibuksan kaniadtong adlaw’ng Martes sulod sa bag-ong Convention & Sports Complex.
Ang maong kalihokan gisalmotan sa liboan ka mga delegado nga naglangkob sa mga tourism officers, city ug municipal officials kinsa nagrepresentar sa nagkadaiyang syudad, lungsod ug rehiyon sa tibuok nasud sa Pilipinas.
Angayang masayran nga ang ATOP maoy opisyal nga kahugpungan sa mga tourism officers sa nasud sa Pilipinas nga gidasonan sa Department of Tourism diin si Provincial Tourism Officer Atty. Ivan Patrick Ang maoy National Executive Vice-President niini.
Sa pagbukas sa 13th National Convention, ang mga partisipante nagsuot sa mga nagkalain-laing traditional ug regional attire nga naghulagway sa mga nagkadaiyang kultura sa ilang matag syudad ug lungsod.
Sa iyang mensahe, si Gov. Rolando Yebes kinsa nagsuot ug Subanen Attire ang naghulagway sa ZaNorte isip usa ka paraiso diin kini malinawon ug gipreserbar usab ang mga kultura sa lumad nga Subanen.
Matud pa niya nga ang turismo maoy usa sa mga instrumento aron makab-ot ang kalamboan sa nasud diin ang ZaNorte nagbaton sa mga tourism assets sama sa fine beaches, agri-industrial sites, Subanen tribal communities, waterfalls, historic Dapitan City diin gipuy-an sa nasudnong bayani nga si Dr. Jose Rizal.
Masigarbuhon usab nga gipadayag sa gobernador nga ang ZaNorte resipiente sa upat ka mga prestihiyosong pasidungog ilawom sa iyang pagdumala sa probinsya sama sa Lingkod Bayan Award gumikan sa pagpangampanya batok kapobrehon, Gawad Galing Pook- Hi-Green Program nga nakasentro sa agrikultura, Gawad Galing Pook- Subanen Empowerment u gang Gawad Pamana ng Lahi gumikan sa maayong pang-gobyerno.
Mapasalamaton usab si Gov. Yebes sa ATOP ug sa Department of Tourism human nahimong 2nd runner-up sa Best Festival Event- Provincial Category ang naila na nga Hudyaka ZaNorte Festival sa probinsya.
Si JRMSU Pres. Dr. Edgar Balbuena kinsa mirepresentar ni Sen. Edgardo Angara, ang naghulagway usab sa ZaNorte isip usa sa nanguna nga nagbaton sa ecological spots, cultural sites, nga padayong gipalambo sa probinsya ug gihandom usab ang pagka-historical sa dakbayan sa Dapitan diin naila isip Shrine City of the Philippines human mipuyo dinhi si Dr. Jose Rizal kinsa nagbilin sa iyang mga binuhat.
Si ATOP Pres. Miguel Sison kinsa opisyal nga mideklara sa pagbukas sa ika-13 nga National Convention sa ATOP, ang mipadayag nga ang Mindanao dili angay kahadlokan kundili angay nga ipromoter gumikan sa mga nagkadaiyang tourist destination nga anaa niini.
Dugang pa niya nga ang turismo maoy behikulo sa kalinaw ug gihagit niya ang mga tourism officers ug uban pang opisyales nga maghimo ug kausaban sa komunidad aron mabatonan ang maayong imahe nga magdala sa kalamboan sa matag syudad, lungsod ug probinsya.
MARDY D. LIBRES