Sa interview sa RMN DXDR kang Engr. Alimpulos, gitumbok niya ang padayung gitrabaho nga commercial complex sa boulevard diin mao na unya ang sentro sa mga patigayun ilabina panahon sa kagabhion tungod kay dagsaon man ug daghang tawo ang boulevard. Gawas pa niana, ang pagatukurong Corazon Aquino Memorial Hospital sa Brgy. Biasong, nga diha na unya makapatambal ang mga pobring katawhan tungod kay lauman man nga barato kini isip gipadagan sa kagamhanang local sa Dipolog.
Hinay-hinay na usab sila sa pagpanlimpyo sa mga dagkung creek sa Dipolog sa paglikay sa pagbaha bisan sa hinay nga pag-ulan, kauban ang City Engineering Office ug ang City General Services Office (CGSO).
Padayun pa usab ang trabaho sa Dipolog Sports Complex sa Brgy. Olingan, diin usa sa priority projects ni Mayor Evelyn Uy.
Tungod niini, giangkon ni Engr. Alimpulos nga dakung pundo ang kinahanglan alang sa pagtiwas sa maong mga proyekto, hinungdan nga kinahanglang mangita ug laing mga tinubdan sa budget ang syudad, ilabina niini tungura nga nakuhaan ang internal revenue allotment (IRA) sa Dipolog human nadugangan ang mga syudad sa nasud.
Apan bisan pa niana, si Engr. Alimpulos nagkanayun nga sa hinay-hinay nga pagtrabaho sa mga proyekto, positibo gyud nga makab-ot ang Swigapore 2030.
ARCHER M. CAPADESO