Kini ang gipklaru ni Dipolog city councilor Atty. James Verduguez sa interview sa Straight to the Point sa RMN DXDR, subay sa gipasaka niining mosyon sa Sangguniang Panglunsod ning syudad nga ipatawag ang Maharlika Dragon Mining Company ug ang Mines and Geosciences Bureau (MGB), aron i-esplikar ang permit nga gihatag ngadto sa maong mining company nga nag-operate sa lugar duol sa Layawan river.
Matud pa ni konsehal Verduguez nga tumong lamang sa ipahigayun unyang legislative inquiry, aron sutaon ang kaluwasan sa Layawan river gikan sa mga kemikal nga gigamit sa chromite mining, ilabina nga watershed area man ang lugar, ug usa ang mga katawhan sa dakbayan sa Dipolog nga konsumante sa tubig gikan sa maong suba.
Samtang gawas sa kaluwasan sa tubig, gusto usab siguradoon sa maong konsehal kung unsa ka luwas ang kabukiran sulod sa mining area, kung mobundak ang kusug nga ulan, human gitagaan niini ug importansya ang nahitabo sa dakbayan sa Iligan ug Cagayan de oro, diin gikan sa kabukiran sa lanao del sur ang mga dagkung troso ug ang pagdahili sa yuta tungod kay grabi man ang mining operation sa lugar. Nabalaka si konsehal Verduguez tungod kay ang Dipolog, gilibotan man usab ug dagkung suba, nga nagkonektar sa Layawan river.
Apan kung masuta nila sa konseho nga luwas ang mining operation sa maong lugar uban ang kompirmasyon sa MGB, hayan nga suportaan sa konsehal ang mina, tungod kay dili man kini supak sa responsabling pagmina.
ARCHER M. CAPADESO