Mao kini ang nasayran gikan sa Buhatan sa Impormasyon sa gipahigayong Consultative Meeting nga gipanguluhan ni Konsehal James Cyril O. Ruiz, ang Chairman sa Committee on Energy, Transportation and Communication karong bag-o.
Misalmot sa maong panagtigum mao ang mga personahi sa DTI sa pagpangulo ni Mr. Julius Salaveria, LTO Representative Mr. Eugenio D. Abordo, personahi sa Dipolog PNP sa pagpangulo ni P/Supt. Joven R. Parcon, Atty. Liza Jane Estaño, ang kasamtangang City Legal Officer, CMO representative Mr. Edwin Bation, representante sa TMO sa pagpangulo ni Atty. Raul Barbaso, City Information Officer Mr. Roberto Pinsoy ug ang mga personahi sa Team DAVID.
Kahibaloan nga nasabutan sa mga representante sa mga nagkalain-laing hingtungdang ahensiya nga pagasundon ang gipagawas sa Department of Transportation and Communications kaniadtong Hulyo 27 nga memorandum aron mahatagan ug igong panahon ang DTI sa pakipagtimbayayong sa mga kagamhanang lokal nga mupahigayon ug agresibong “public information and education campaign” may kalabot na sa “Helmet Act and its Implementing Rules and Regulations” aron mapatin-aw sa kinabag-ang katawhan ang kamahinungdanon sa maong balaodnon. Hinuon pagasitahon gihapon kadtong mga motorista nga walay helmet aron pagapahimangnuan may kalabot na sa Helmet Act nga hingpit nang ipatuman karong umaabot nga Enero 1, 2013.
Dugang pa niini, gipatin-aw usab ni Atty. Raul Barbaso, ang kasamtangang TMO Consultant, nga padayon pa gihapon ang pagpang-issue ug mga citation tickets ngadto sa mga nakalapas sa nagkalain-laing mga seryosong kalapasan sama sa kakulangon sa igong papeles sama sa certificate of motor registration ug driver’s license, illegal parking, obstruction of traffic, ingon man kadtong walay mga head lights, horns, signal lights, side mirrors, tail lights ug uban pang mga mahinungdanon nga gamit sa motor gumikan kay kini importante aron malikayan ang disgrasya sa kadalanan ug usab multa.
MARDY D. LIBRES