Nasayran sa Buhatan sa Impormasyon nga ang pag-implementar sa maong balaodnon ang gitahas karon ngadto sa Dipolog City Composite Team nga gimugna pinaagi sa Executive Order No. 2012-05 nga gi-aprobahan ni City Mayor Evelyn T. Uy, kansang tumong ug tinguha niini mao nga mapahapsay ang dagan sa trapiko dinhi palibot sa siyudad ug aron usab makunhoran ang mga aksidente sa kadalanan ug ingon man usab nga masulbad na ang kaso sa krimen karon dinhi sa dakbayan.
Kahibaloan nga daghanan na kaayo ang kinabuhi nga nakalas ug mga nanga-angol gumikan sa aksidente sa kadalanan gumikan sa depektusong mga accessories sa mga sakyanan partikular na ang mga head lights, tail lights ug brake lights. Dugang pa nga kadaghanan karon wala na mugamit ug side mirrors hinungdan nga dali kining ma-out-balance tungod kay kinahanglan paman nga mulingi sa likod ayha makaliko.
Sumala pa nga gihingusgan usab sa maong grupo ang pagpatuman sa “No Helmet (Driver)/ Plate/ License/ Certificate of Registration, No Travel” policy.
Gumikan niini, nanawagan karon si Mr. Edgar Tangcalagan, ang bag-ohay karon nga gidesignar isip Traffic Management Office Action Officer for Operations, ngadto sa mga katawhan sa paghatag sa ilang bug-os nga suporta ug kooperasyon ngadto sa mga balaod sa trapiko nga gi-adaptar karon sa dakbayan aron mamahimong hapsay ug malinawon ang atong siyudad.
Isip dugang pagpatin-aw, gibutyag ni Mr. Tangcalagan ngadto sa tanan nga wala gayud pagatugti ang si bisan kinsang empleyado o opisyal sa kagamhanan dili lamang sa dakbayan, nga mamahimong mga fixers alayon sa gisagop karon nga Citizen’s Charter sa kagamhanang lokal sa Dipolog.
MARDY D. LIBRES