Karong adlawng Martes, petsa 17 hangtud sa adlawng Domingo, petsa 22 ning bulan sa Enero 2012, pito ka mga sakop sa Sangguniang Panlalawigan ang mobyahe, nga nilangkob usab sa Committee on Tourism, pinanguluhan ni Board Member Atty. Michael Allan Ranillo, mokuyug usab si Vice Governor Francis Olvis, ug Provincial Tourism Officer Atty. Ivan Patrick Ang.
Ang probinsya sa Laguna maaoy unang bisitahun sa maong mga opisyal tungod kay giila man sa Department of Tourism ang festival sa naasyong lalawigan nga usa sa pinakanindot nga festival sa nasud.
Matud pa ni Board Member Atty. Ranillo, Chairman sa Committee on Tourism, nga namugna kining lakang nga pag-tour sa mga Board Members gumikan sa naka-ung ung karon diha sa Sangguniang Panlalawigan, kabahin sa unsang paagi ipadagan ang kasamtangang Hudyaka festival, diin gipilian nilang mga magbabalaod, kung mahimu bang ipaagi na ug ordinansa ang maong festival nga ang kagamhanang probinsyal maoy mag-abaga sa tanang galastuhan niini, kung mahimu ba pud usab nga ipadagan kini pinaagi’g foundation sama sa Sinulog foundation sa Cebu, o kung mahimu ba nga ang provincial tourism council na bahala pagpadagan sa Hudyaka festival.
Kining tanang mga konsiderasyon, matud pa ni Board Member Ranillo, magdepende lang unya kung unsa ang ilang makita human ang tour karong sunod semana.
ARCHER M. CAPADESO