Kini tungod kay strikto nang ipatuman ni Mayor Evelyn Uy ang zoning ordinance ning syudad diin nagbutyag nga ang sentro sa Dipolog usa kini ka commercial area, diin wala laing tugutang mobarug nga estbalismento kondili mga komersyal nga patigayun lamang.
Sa pakighinabi sa RMN DXDR ngadto kang Engr. Albert Alimpulos sa Office of the Building Official (OBO), siya nagkanayun nga dili naman bag-o ang zoning nga ipatuman sa syudad tungod kay matud pa nilabay na ang tulo ka tuig nga gilugway sa syudad ngadto sa mga tag-iya ug car wash center ug mga vulcanizing shop nga mopahawa sa ilang pwesto, apan mas nidaghan man hinoon ang nagpundar sa maong negosyo.
Dugang pa ni Engr. Alimpulos nga ang gitugutan lamang nga lugar diin mahimung anaa mga vulcanizing shop ug car wash center, mao ang barangay Sta. Isabel ug Sta.filomina, ang brgy. Turno, ug ang bgy. Minaog; isip maoy gideterminar nga mga industrial areas sa zoning ordinance.
Subay niini, gibisita na usab sa taga Licensing Division sa City Hall ang matag vulcanizing shop ug car wash center nga anaa sa sentro sa syudad, aron ipahibalo ang ilang pagpapahawa sa dili madugay.
ARCHER M. CAPADESO